حوار : أسعد البيطار

أشعل النجم زين العمر ليل مهرجانات القاع الذي تكللّ بحفل ناجح وجماهيري في الخامس عشر من الشهر الحالي . وأعرب العمر خلال الحفل عن سعادته بالغناء في ربوع بلدة القاع الصامدة ، معتبرا أنه في وسط أهله فلا يجوز البروتوكول . كما تفاعل معه الحضور حين غنّى أغانيه الخاصة لاسيما حين غنّى للوطن .

أسرة موقعنا تواجدت في الحفل وعدنا لكم بهذا اللقاء مع الفنان زين العمر .

شو الأثر اللي تركو فيك مهرجان القاع ؟

القاع بلدي ، أهلي وربعي ، وأنا اليوم كتير إنبسطت والله يحمي القاع وأهلها ، محبتي لكل أهالي القاع ولكل إم شهيد، وأنا كنت عم غني لكل نقطة دم شهيد سقطت بالقاع .

من شوفك على مواقع التواصل الإجتماعي كتير بتحب تظهر عيلتك ، هل برأيك لازم الفنان يكون عم بفرجي عيلتو أو بتلاقي مش ضرورة كتير متل ما بيعملو أغلبية الفنانين ؟

أنا ولادي بشوف حالي فيون والله يحميلي ياهن ويحمي ولاد العالم ، أنا إتزوجت كرمال يكون عندي عيلة وبشوف حالي بولادي قد الدّني كلاّ وبحبن . أنا حابب إنبسطت معهن وفيون . وأنا كوني إتزوجت بعمر صغير بحس ولادي متل رفقاتي ليش بدي إستحي إني إظهرن ؟ أنا ما بخبي حياتي وماعندي شي مخبى .

إنت قلت بالحفلة ، إنّك ما بتحب البروتوكول ، شو تعليقك على الفنانين اللي بتواجدو بالحفلات والمهرجانات وما بتفاعلو مع الجمهور أو الفانز ؟

ما عندي أي تعليق على اي فنان ، الله يوفقون ، بالنسبة إلي البروتوكول عندي هنّي الناس ، هول الناس هني تاج على راسي ، إذا ما في ناس ما في شي ، محبة الناس ورضى الله بيسوا مال الكون كلو . كتّر خير الله بتمنى الناس يضلو يحبونا هيدا أكبر كنز على راسي .

عم نشوف إنو الموسم الصيفي عندك مليء بالحفلات وهل في سينغل رح تنزل قريبا ؟

عم نحضّر أغنيتبن مع علي المولى وفضل سليمان بعد شي عشرين او تلاتين يوم بيزلو ، وبالنسبة للحفلات الناس رح يضلو يشوفني بالإعلانات لغاية أيلول وعندي بكل المناطق اللبنانية كتر خير الله وبشكر محبة العالم أكتر ما منستاهل .

وفي ختام اللقاء، تمنى لنا النجم زين العمر أن يصبح موقعنا الإلكتروني من أهم المواقع الفنية . كما بدورنا نتمنى له المزيد من الإستمرارية والتقدم والنجاح في أعماله المرتقبة