كبريق النجوم لمع بسرعة الممثل اللبناني الشاب قاسم منصور ، وعلى هامش هذا التشبيه كان لموقعنا معه هذا الحوار :

حوار : أسعد البيطار

١- عرفنا أكتر عن حالك وكيف دخلت إلى عالم التمثيل؟

إسمي قاسم يوسف منصور وعمري 27 سنة ، من هواياتي الرياضة على أنواعها ، درست فندقية (شيف مطبخ ) وكان عندي موهبة التمثيل من أنا وصغير بس ما كان في عندي الفرصة . وبالصدفة شاء القدر إنو يكون باب دخولي إلى عالم التمثيل هو تصوير الإعلانات والكليبات لحتى كان إلي أول مشاركة تمثيلية من خلال مسلسل الشقيقتان .

٢- كم عمل درامي صار برصيدك؟

الحب جنون ، تانغو ، البيت الأبيض ، الباشا ، وخمسة ونص .

٣- شو الدور اللي بيلفتك وبتحب إنك تأديه؟

بتلفتني أدوار الشرّ لأن بتبقى بفكر المشاهد وبترسخ براسه ، وهلق عم دور على كراكتيرات جديدة متل الأدوار اللي فيها تفكير وبعد وأفق للشخصية بمعنى بحب الأدوار المركبة وقريبا رح تشفوني بعمل عم بلعب فيه شخصية مركبة ، رح تكون شخصية حلوة .

٤- برأيك شو بينقصا الدراما اللبنانية تتصير عالمية ؟

برأي ما بينقصنا شي لأن صار عنّا كتابة حلوة وإنتاج قوي ، وحاليا عم من بلش نفوت على العالمية خصوصة مع إدخال بعض المسلسلات اللي صدرت مؤخرا على موقع Netflex متل تانغو والكاتب والهيبة وغيرون . وفي كتير من شركات الإنتاج اللبنانية عم تطّور من الإنتاج اللبناني ، وبشوف يمكن بعد ثلاثة أو أربع سنين رح نصير عم نافس برياحة على صعيد العالم مش بس على صعيد العالم العربي .

٥- خبرنا أكتر عن أجدد أعمالك وشو ناطرنا؟

حاليا عم شارك بعملين ، الأول مسلسل إسمو لو ما لتقينا من بطولة الممثل يوسف الخال والممثلة سارة أبي كنعان ، ومن إنتاج شركة غولد فيلم ، بإدارة المخرجة كارولين ميلان ، والمسلسل هو من إخراج إيلي رموز وكتابة ندى عماد خليل . وأنا آخد فيه مساعد بطولة ، شخصية كتير حلوة لدرجة إنو بالأول العالم رح تكرها بس بالآخر رح يطعاطفوا معا . أمّا العمل التاني مع كارين رزق الله ، مسلسل إسمو راحو من إخراج نديم مهنا ، ورح كون فيه ضيف شرف ، والشخصية كمان رح تنتقدا العالم .

٦- التمثيل بالنسبة إلك هواية أو مهنية؟ وهل عندك side business؟

بالنسبة إلي التمثيل بلشت هواية بس هلق بطل فيني إعتبرا بس هواية بل كمهنة لأني عايش منا ، صحيح بعدني ما وصلت للأشيا اللي بدي ياها ، بس قريبا بشوف حالي رح اوصلا . بالنسبة لل side business نحنا عنّا مطعم للوالد ومتل ما قلتلك قبل أنا درست شيف مطبخ ومنو تعلمت سرّ المهنة يعني نحنا صرلنا أكتر من 12 سنة فاتحين المطعم .

٧- شو هوايتك المفضلة ؟

متل ما قلتلك بالأول ، الرياضة على أنواعا هي أفضل هوياتي وحاليا كتير عم بهمتم بالFitness وعم بشتغل على جسمي بالجيم .

٨- سميلي نجم و نجمة بتحب تشارك إلى جانبن بعمل ما؟

بحب إشتغل مع أكتر من نجم متل محمد رمضان ، عابد فهد ، باسم ياخور وبلاقي حالي أقرب لكراكتير الممثل عابد فهد، إذا بشتغل معو بحس رح يطلع شي كتير حلو. أما بالنسبة للنجمة اللي بحب إشتغل معا بعمل هي الممثلة المصرية سارة الهاني لأنو تمثيلا رائع.

٩- شبهوك كتير للممثلين الأترك ، إنت كيف بتشوف حالك؟

صح شبهوني كتير بالأتراك وشبهوني بالسورين وشبهوني شوي ل جوني ديب ، يعني بالنهاية هيدا الشي من الله ما بعرف اديش الو تأثير أو اديش بفيدني . بمرحلة معينة كنت بالأول إيه كتير أنبسط بالفكرة إنو بشبه بوراك بس إنو هلق صرت لاقيا كتير عايدة ، بالنهاية هيدا شي رباني .

١٠- برأيك شو الصعوبات اللي بتواجه الممثل اللبناني خلال مسيرتو الفنية ؟

الصعوبات اللي بتواجه الممثل اللبناني هي أولا مافي كتير أدوار متاحة للشباب وما عم بكون في دايما شخصيات جديدة بالمسلسلات ، وما عم يعطوا المجال للكتاب كرمال يزيدو من حجم الدور للشباب ، وإضافة لعدد شركات إلإنتاج القليل بلبنان لأن كل ما زادو الشركات كل ما تعدّدت المسلسلات والأفلام ونحنا بحاجة لهيدا الشي بصراحة .

١١- شو موقفك من قصة التنمر على السوشيل ميدا للنجوم خصوصة إنك حدا active على هيدي المواقع؟

بالنسبة إلي السوشيل ميديا سيف ذو حدين ، يا إما بيئذيك ويا إما بنجحك ، هلق ما في إنسان ناجح ما بيوصلو إنتقدات بس في عالم مشكلتا إنو بتحكي بصورة سيئة أو بتعمل تصرفات سيئة كرمال تستفز هيدا النجم لحتى يردّ عليها ، المهم هيدا شي منو حلو أبدا وكتير بشع لأنو لمّأ ينحكى بإسمك أو ينحكى شي عن لسانك أو عنك وإنت ما تكون حاكي ، العالم ما رح تقول إنو هيدا Fake Account أو هيدا حدا عم يستغلّ ، رح يقولو ليكو أخلاق هيدا الممثل مثلا . فهو أكيد أنا ضد هيدا الشي وبتمنى يكون في ملاحقة قانونية يعني هلق متل ما عم بصير يمكن بلشت شوي يشتغلوا على هيدا الموضوع ، فإنشالله يتوقفوا كل هل الأشخاص المأذين .

١٢ – كلمة أخيرة .

أولا بحب أشكرك يا أسعد البيطار على هل المقابلة السريعة المهضومة .. بتمنى كلّ إنسان بحب شي يشتغل عليه ليوصلوا لأنو لذة النجاح لمّا بتحسّ حالك وصلت لشي إنت عم دوّر عليه لتوصلوا أو إنت بتحبوا هاي كتير حلوة . بتمنى التوفيق للجميع وإنشالله بلدنا هيك بينعم بالسلام ونخفف شوي من هل الفوضى الموجودة والله يهدي الأوضاع لأنو الأوضاع الأمنية مش كتير رايقة وشكرا الك ولكل الفانز اللي عم يتابعوني ويدعموني لأني أنا عم بكبر بمحبتن .